Jan Arendz en Marijke Geertsma spylje tegearre mei musikant Tseard Nauta en in koar ûnder lieding fan Sjoukje Heins-Scheltema fan 10 april ôf de nije foarstelling It Spoar Werom, basearre op it boek Had het anders gekund fan Abel de Jong.

De foarstelling giet oer Abel, in Joadsk jonkje dat yn 1940 berne wurdt en op 2-jierrige leeftyd ûnderdûkt om te ûntkommen oan de oarloch. Syn âlders belove him dat se him sa gau mooglik ophelje sille, mar Abel wurdt noait werienige mei harren. As folwoeksenen giet hy op syk nei it ferhaal fan syn âlders: It Spoar Werom. In emosjonele syktocht fol dramatyske mominten, basearre op wier barde foarfallen.

It Spoar Werom is in unike foarstelling mei muzyk fan Tseard Nauta en in koar ûnder lieding fan Sjoukje Heins-Scheltema. It stik wurdt opfierd yn de histoaryske Martinitsjerke fan Easterein, in lokaasje dy’t djip ferbûn is mei it tema fan de foarstelling.

It doarp Easterein sil aktyf meidwaan oan dit barren mei meiwurking fan ferskate organisaasjes, ynklusyf Doarpsbelang, de Oranjeferiening, de Toanielferiening, it Korps, kafee Bergsma en de basisskoalle. Mei harren ynset wurdt It Spoar Werom in ûnferjitlike ûnderfining foar de hiele mienskip.

As ekstra kinne besikers in itentsje bestelle by kafee Bergsma. Nei de middeisfoarstelling en ek foar de jûnsfoarstelling is der in mooglikheid om yn Kafee Bergsma te iten. Dat is yn buffetfoarm en it is iepen fan 17.30 oant 19.00. It buffet kostet € 24,50. Ofrekkenje by Bergsma. By it keapjen fan in kaartsje kinne jo opjaan as jo mei ite wolle en mei hoefolle persoanen.